ኢትዮጵያ ሳምንታዊ ዘገባ (ሐምሌ 9, 2016)

የሁኔታዎች አጭር መግለጫ

በኦሮሚያ እና በአማራ ክልሎች እየተካሄዱ ካሉ የፀረ መንግሥት አመፆች ጋር በተያያዘ በተፈጠሩ የፀጥታ ችግሮች ሰላማዊ ሰዎች መጎዳታቸውን ቀጥለዋል። ይህ በእንዲህ እንዳለ የሶማሊላንድ ወታደሮች በኢትዮጵያ ስልጠና የጀመሩ ሲሆን ይኼውም ውጥረት እንዲጨምር አድርጓል።

በኦሮሚያ ክልል እየታየ ያለው የፀጥታ ሁኔታ

በኦሮሞ ነፃነት ሠራዊት(ኦነሠ)—በመንግሥት የኦሮሞ ነፃነት ግንባር (ኦነግ)-ሸኔ ተብሎ የሚጠራ— እና በኢትዮጵያ መከላከያ ሠራዊት መካከል የሚደረጉ ውጊያዎች ባለፈው ሳምንት መቀነስ ያሳዩ ሲሆን በምስራቅ፣ ምዕራብ እና በሆሮ ጉድሩ ወለጋ ዞኖች ውጊያዎች ተመዝግበዋል። ቀደም ባለው ሳምንት ከ100 ተማሪዎች በላይ ታግተው ከመወሰዳቸው ጋር በተያያዘ የተፈጠረው ከፍተኛ ውጥረት ባለፈው ሳምንትም በተመሳሳይ ሁኔታ የቀጠለ ሲሆን ኦነሠ/ኦነግ-ሸኔ እና መንግሥት እርስ በእርስ መወነጃጀላቸውን ቀጥለዋል። የኦሮሚያ ክልል መንግሥት ከታገቱት 167 ተማሪዎች መካከል 160 ተማሪዎችን ማስለቀቁን ገልጧል。¹ ይሁንና የተጎጂዎች ቤተሰቦች አብዛኛዎቹ ተማሪዎች አሁንም በአጋቾች እጅ የሚገኙ መሆኑን የገለፁ ሲሆን አጋቾቹም ተማሪዎቹን ለመልቀቅ ከ500,000 እስከ 1 ሚሊዮን ብር (ከ8,000 እስከ 17,000 የአሜሪካን ዶላር) በመጠየቅ ላይ ይገኛሉ。² ኦነሠ/ኦነግ-ሸኔ ለድርጊቱ ተጠያቂ አለመሆኑን በመግለጽ ለተማሪዎቹ እገታ የመንግሥት ኃይሎችን፣ የአካባቢ ካድሬዎችን እና ስራ አጥ ወጣቶችን ከሷል።³ በኦሮሚያ ክልል በቅርብ ዓመታት እገታ እና አጠቃላይ የደህንነት እጦት ትልቅ ችግር ሆኖ ቀጥለዋል⁴(ለተጨማሪ መረጃ የኢፒኦ ሳምንታዊ፡ ጥቅምት 3-9, 2016 እና ኢፒኦ ሳምንታዊ ጥቅምት 10-16, 2016 ይመልከቱ)። ይሁንና በአንዳንድ አካባቢዎች የፀጥታ ሁኔታ መሻሻል የሳየ ቢመስልም ጠቅላይ ሚኒስቴር አብይ አሕመድ በግንቦት ወር የድጋፍ ሰልፍ ላይ በተሳተፉባት በምስራቅ ወለጋ ዞን ነቀምቴ ከተማ በሚገኘው አዲሱ አየር ማረፊያ መደበኛ በረራዎች እያረፉ ይገኛሉ。⁵ ወደ ደምቢዶሎ የሚደረጉ በረራዎችም በየካቲት ወር ውስጥ ጀምረዋል。⁶

በአማራ ክልል የተኩስ ልውውጥ

በአማራ ክልል የተመሠረተው የሰላም ኮሚቴ ጥረቱን ቢቀጥልም በኢትዮጵያ መከላከያ ሠራዊት እና በፋኖ ታጣቂዎች መካከል የሚደረግ ውጊያ ሳይቋረጥ ቀጥሏል። የመንግሥት እና ከመንግሥት በተቃራኒ የቆሙ ምንጮች እንደዘገቡት በሰሜን ሸዋ፣ ደቡብ ጎንደር፣ ሰሜን ወሎ፣ አዊ፣ ማዕከላዊ ጎንደር፣ ሰሜን ጎንደር፣ ደቡብ ወሎ፣ ምዕራብ ጎጃም እና ምስራቅ ጎጃም ዞኖች ውጊያዎች ተደርገዋል። ይህ በእንዲህ እንዳለ አሁንም በአማራ ክልል በሱዳን ስደተኞች ላይ በታጣቂዎች የሚፈፀሙ ጥቃቶች ቀጥለዋል። ባለፈው ሳምንት ሁለት ጥቃቶች፤ አንዱ በምዕራብ ጎንደር የኩመር ካምፕ አቅራቢያ እና ሁለተኛው በማዕከላዊ ጎንደር ዞን በሸሂዲ እና ጎንደር መካከል ያለውን መንገድ ተከትሎ ባለው አካባቢ ሰኔ 28 እና ሐምሌ 2, 2016 ተፈፅመዋል። የሱዳን ስደተኞችን ኢላማ ያደረጉ ጥቃቶች ከግንቦት ወር ጀምሮ በድንበር አካባቢ ባሉ ካምፖች ትላልቅ ሰልፎችን ቀስቅሰዋል። ሰኔ 29 ቀን የሱዳን ስደተኞች ማንነታቸው ባልታወቀ ታጣቂዎች አንድ ቀን ቀደም ብሎ የታገተ የሀገራቸው ስደተኛ እንዲለቀቅ በመጠየቅ በምዕራብ ጎንደር ዞን በመተማ ወረዳ የተቃውሞ ሰልፍ አድርገዋል። በግንቦት ወር ውስጥ የኢትዮጵያ መንግሥት የስደተኞችን ደህንነት ለማሻሻል ቃል ገብቶ ነበር።⁷

የሶማሊላንድ ወታደሮች ሶማሊ ክልል መግባት

በሺህ የሚቆጠሩ የሶማሊላንድ ወታደሮች ለውትድርና ስልጠና የኢትዮጵያ ሶማሊ ክልል የገቡ ሲሆን ይኽውም በጥር ወር በሁለቱ ወገኖች መካከል የመግባቢያ ሰነድ ከተፈረመ ጊዜ ጀምሮ ጥብቅ ትብብር ስለመፈጠሩ ግልጽ ማሳያ ነው። መጋቢት 26 ቀን ከስምምነቱ ጋር ተያይዞ በተፈጠረ ውጥረት ሶማሊያ የኢትዮጵያን አምባሳደር ከሀገሯ ያባረረች ሲሆን የራሷንም አምባሳደር ከአዲስ አበባ መልሳ ጠርታለች።

ኢትዮጵያ በጨረፍታ
ሰኔ 29-ሐምሌ 5, 2016

ይህ መረጃ/ዳታ ከሰኔ 29 እስከ ሐምሌ 5, 2016 ያለውን ጊዜ ይሸፍናል። አክሌድ መረጃን እንዴት እንደሚሰበስብ እና ኩነቶችን እንዴት እንደሚመድብ ተጨማሪ መረጃ ለማግኘት የአክሌድን የኮድ መጽሐፍን ይመልከቱ። በዚህ የጊዜ ገደብ ውስጥ የተከሰቱ አንዳንድ ኩነቶች በዘገባ መዘግየት ምክንያት በሚቀጥሉት ሳምንታት ዳታ ውስጥ ሊካተቱ ይችላሉ።

• የፖለቲካ ግጭት ኩነቶች⁸: 2
• +100% ከባለፈው ሳምንት ጋር ሲነፃፀር

የኩነት አይነቶች

ውጊያዎች: 26 ኩነቶች

ፍንዳታዎች/ የርቀት ግጭት: 4 ኩነት

ሰላማዊ ሰዎች ላይ የደረሱ ጥቃቶች: 10 ኩነቶች

የአመፅ ግጭት: 0 ኩነት

ሰልፎች: 2 ኩነት

ግጭት ያለበት የተቃውሞ ሰልፍ: 0 ኩነት